近日，陳展鵬同單文柔（Phoebe）搞完「小豬比」嘅百日宴後，兩夫妻首次一齊出席公開活動，啱啱成為人母嘅Phoebe喺個人社交平台上表示，佢最近開始留意有關素食嘅資訊。唔知係咪因為佢做咗人媽媽之後，對飲食習慣方面開始有更高嘅要求呢？
其實喺近呢幾年，素食文化已經逐漸成為熱潮，圈中亦有多位被公認為凍齡美女嘅星媽，同樣係素食者，到底素食文化有咩好處呢？
(單文柔ig@smyphoebe)
(單文柔ig@smyphoebe)
唐寧受動物感動戒肉 如今童顏依然
已經有兩個小朋友嘅唐寧(Leila)，今年已經38歲，出名係童顏嘅Leila，原來係一位素食者。唐寧食素嘅初心並非因為想保養皮膚，而係因為佢睇咗一個關於一位豬農變成素食者嘅訪問後，感覺到豬好有靈性，而唔忍心將佢哋宰殺。點知茹素竟然成為咗佢保持童顏嘅因素。Leila話，茹素後，身體減少咗負荷，成個人都變得開心同埋健康。
(唐寧ig@leilakong1205)
不過唐寧提醒大家，想食素嘅話就先要了解自己嘅身體狀況，要知道自己欠缺啲咩，再加以補充，最基本係食五色食物，如黑、白、紅、黃、綠，唔好只偏重任何一類。
(唐寧ig@leilakong1205)
謝安琪曾4度爆肺 食素增強復元能力
現年42歲嘅謝安琪(Kay)，雖然工事繁忙，又要湊小朋友，為咗家庭奔波勞碌嘅佢，反而一日比一日靚，仲保持到青春嘅外貌。到底佢有乜嘢逆齡嘅秘訣呢?原來阿Kay喺較早之前，就已經開始改為食素，佢話食素不但可更容易消化，仲可令身體易於吸收。對於經常需要「用氣」工作嘅阿Kay，除咗唱歌之外，仲有為《反斗奇兵4》電影做配音工作。雖然好多人都覺得食素會令身體變得唔夠氣力，但阿Kay就否定咗呢個說法，仲話食咗素之後，身體反而變得更好。
(謝安琪ig@kaytse)
(謝安琪ig@kaytse)
過去曾4度爆肺嘅阿Kay，曾接受公開訪問表示，食素令佢身體嘅復元能力提升咗。阿Kay嘅醫生話，大部分爆過肺嘅人，一般都需要花一個月以上時間休息先可以復元，但阿Kay只係需要休息幾日就已經可以出院。
林憶蓮食素本為減肥 意外連皮膚都受惠
今年已經53歲嘅星媽林憶蓮，本身食素係為咗減肥，點知一食就為佢帶來咗唔少好處。憶蓮之所以用素食嘅方法減肥，全因一次佢朋友話：「食素好處多，唔止可以享 『瘦』一下，仲可以徹底改變體質，連帶皮膚都可以變好。」結果，憶蓮改變咗飲食習慣之後，喺一次出席公開活動時，被人大讚皮膚好。憶蓮當時亦坦言，變靚全因素食關係：「食咗(素)精神狀態好啲，各方面都好啲。」
（林憶蓮ig@sandylam_hk）
（林憶蓮微博）
（林憶蓮微博）
食素雖然好處多 卻並非人人合適
根據衛生署所提供的健康資訊顯示, 素食食品含豐富膳食纖維, 進食後容易產生飽足嘅感覺， 繼而可以控制食量，幫助保持適中體重及減低患上腸癌、痔瘡和便秘嘅機會；亦因素食食品含較少脂肪，因而有助減低患上心臟病、高血壓、中風、癌症、肥胖和膽結石等疾病嘅機會。
不過, 有啲營養素只有肉、蛋同奶類食品先提供到，而素食人士唔食肉類，有啲甚至唔食奶同蛋類食品，身體就會缺少呢啲營養素，造成營養唔均衡嘅現象，有時更會引致營養不良、體力不振、貧血及其他疾病。 所以，素食人士應該特別注意食物嘅選擇與配搭，或按醫生指示，進食維他命或其他營養補充品。